Archive for category Alþingiskosningar

Sósíalistar boða framboð til Alþingis

Félagsfundur Sósíalistaflokks Íslands hefur samþykkt að undirbúa framboð flokksins til næstu Alþingiskosninga. Flokkurinn bauð fram í síðustu borgarstjórnarkosningum og hlaut þá einn borgarfulltrúa. Formaður framkvæmdastjórnar Sósíalistaflokks Íslands og helsti talsmaður er Gunnar Smári Egilsson fv. útgefandi og ritstjóri. Listabókstafur flokksins er J.

Færðu inn athugasemd

Árið 2019

Þrátt fyrir að engar kosningar hafi verið á árinu 2019 var það ekki tíðindalaust. Breytingar urðu á ríkisstjórn, þingmenn færðust milli þingflokka og fjögur sveitarfélög á Austurlandi sameinuðust.

Í febrúar gengu Karl Gauti Hjaltason og Ólafur Ísleifsson, sem kjörnir voru á þing fyrir Flokk fólksins en höfðu verið utan þingflokka um skamma hríð, í Miðflokkinn.

Í september tók Áslaug Arna Sigurbjörnsdóttir við embætti dómsmálaráðherra af Þórdísi Kolbrúnu Reykfjörð Gylfadóttur sem gengt hafði embættinu um skamma hríð eftir afsögn Sigríðar Andersen í mars.

Í október samþykktu íbúar fjögurra sveitarfélaga á Austurlandi sameiningu þeirra í eitt. Það voru Borgarfjarðarhreppur, Djúpavogshreppur, Fljótsdalshérað og Seyðisfjarðarkaupstaður.

Í nóvember sagði Andrés Ingi Jónsson sig úr þingflokki Vinstrihreyfingarinnar græns framboðs og stendur nú utan þingflokka.

Á árinu 2020 rennur út kjörtímabil Guðna Th. Jóhannesson forseta Íslands og verða því forsetakosningar haldnar á árinu.

 

Færðu inn athugasemd

Andrés Ingi Jónsson segir sig úr þingflokki VG

Andrés Ingi Jónsson þingmaður Vinstrihreyfingarinnar græns framboðs hefur sagt sig úr þingflokki VG og mun hér eftir starfa sem þingmaður Utan flokka.

Færðu inn athugasemd

Sameining samþykkt á Austurlandi.

Sveitarfélögum mun í vor fækka úr 72 í 69 í eftir að íbúar Borgarfjarðarhrepps, Djúpavogshrepps, Fljótsdalshéraðs og Seyðisfjarðarkaupstaðar samþykktu að sameina sveitarfélögin í atkvæðagreiðslu í gær. Þegar sameiningin tekur gildi verða aðeins fjögur sveitarfélög á Austurlandi, Fjarðabyggð, Vopnafjarðarhreppur, Fljótsdalshreppur og hið nýja sameinaða sveitarfélag.

Samkvæmt vefmiðlinum Austurfrett.is voru úrslit eftirfarandi:

Borgarfjarðarhreppur: Já 44 (72,1%) Nei 17 (27,9%). Auðir og ógildir 7. Kjörsókn 71,6%.

Djúpavogshreppur: Já 156 (64,2%) Nei 87 (35,8%). Auðir og ógildir 2. Kjörsókn 78,0%.

Fljótsdalshérað: Já 1291 (93,9%) Nei 84 (6,1%). Auðir og ógildir 15. Kjörsókn 77,2%.

Seyðisfjarðarkaupstaður: Já 312 (87,4%) Nei 45 (12,6%). Auðir og ógildir 3. Kjörsókn 70,7%.

Samtals öll sveitarfélög: Já 1803 (88,6%) Nei 233 (11,4%). Auðir og ógildir 27. Kjörsókn 75,9%. Samtals samþykktu sameininguna 66,3% af þeim sem voru á kjörskrá.

Færðu inn athugasemd

Sameiningarkosningar á Austurlandi

Næst komandi laugardag, þann 26. október, ganga íbúar Borgarfjarðarhrepps, Djúpavogshrepps, Fljótsdalshéraðs og Seyðisfjarðarkaupstaðar til atkvæða um hvort sameina eigi sveitarfélögin í eitt. Um síðustu áramót bjuggu 3.600 íbúar í Fljótsdalshéraði, 685 á Seyðisfirði, 472 í Djúpavogshreppi og 109 í Borgarfjarðarhreppi. Samtals voru því íbúar í sveitarfélögunum fjórum 4.866.

Á vef sameiningarverkefnisins segir:

Niðurstaða kosninga um sameiningu er bindandi. Þótt tillaga um sameiningu hljóti ekki samþykki meirihluta kjósenda í öllum sveitarfélögunum sem að tillögunni stóðu, er sveitarstjórnum sveitarfélaga þar sem sameiningartillaga hlýtur samþykki meirihluta kjósenda heimilt að ákveða sameiningu þeirra sveitarfélaga  a.m.k. 2/ 3 sveitarfélaganna og í þeim sveitarfélögum búi a.m.k. 2/ 3 hlutar íbúa á svæðinu.

Ef sameiningin er samþykkt skipa sveitarstjórnir sveitarfélaganna sérstaka stjórn sem hefur það hlutverk að undirbúa stofnun nýs sveitarfélags. Hver sveitarstjórn skipar þrjá fulltrúa í stjórnina. Hlutverk hennar er að semja samþykkt um stjórn og fundarsköp hinnar nýju sveitarstjórnar. Stjórnin tekur einnig ákvarðanir um fjárhagsmálefni hins nýja sveitarfélags, tekur saman yfirlit yfir allar samþykktir og reglugerðir sem gilda í þeim sveitarfélögum sem sameinuð hafa verið og skal hefja vinnu við endurskoðun þeirra og samræmingu.

Stjórnin gerir auk þess tillögu til sveitarstjórrnarráðuneytis um það hvort kosið skuli til sveitarstjórnar fyrir hið nýja sveitarfélag eða sveitarstjórn eins hinna sameinuðu sveitarfélaga falin stjórn þess til loka yfirstandandi kjörtímabils. Meginreglan er að kosið er til nýrrar sveitarstjórnar að afloknum kosningum um sameiningu.

Færðu inn athugasemd

Áslaug Arna nýr dómsmálaráðherra

Tilkynnt var í dag að Áslaug Arna Sigurbjörnsdóttir Sjálfstæðisflokki taki við sem dómsmálaráðherra á morgun af Þórdísi Kolbrúnu R. Gylfadóttur sem gengt hefur embættinu frá því að Sigríður Andersen sagði af sér. Áslaug Arna verður næstyngsti einstaklingur sem tekið hefur verið ráðherraembætti á Íslandi. Aðeins Eysteinn Jónsson Framsóknarflokki var yngri þegar að hann tók við embætti.

Færðu inn athugasemd

Sameining sveitarfélaga?

Lagðar hafa verið fram áætlanir um að ekkert sveitarfélag verði með færri en 250 íbúa við sveitarstjórnarkosningarnar 2022 og að ekkert sveitarfélag verði með færri en 1.000 íbúa árið 2026.

Fjórtán sveitarfélög voru með færri en 250 íbúa þann 1.janúar sl. Þau eru: Kjósarhreppur, Skorradalshreppur, Eyja- og Miklaholtshreppur, Helgafellssveit, Súðavíkurhreppur, Kaldrananeshreppur, Árneshreppur, Skagabyggð, Akrahreppur, Tjörneshreppur, Svalbarðshreppur, Borgarfjarðarhreppur, Fljótsdalshreppur og Ásahreppur.

Heyrst hefur að í mörgum þessara tilfella liggi sameining við nágrannasveitarfélög nokkuð beint við. T.d. að Skorradalshreppur sameinist Borgarbyggð, Helgafellssveit Stykkishólmi, Súðavíkurhreppur Ísafjarðarbæ, Kaldrananes- og Árneshreppar Strandabyggð, Akrahreppur Sveitarfélaginu Skagafirði, Tjörneshreppu Norðurþingi, Svalbarðshreppur Langanesbyggð, Fljótsdalshreppur Fljótsdalshéraði og Ásahreppur Rangárþingi ytra. Skagabyggð er nú þegar í viðræðum við hin sveitarfélögin þrjú í Austur Húnavatnssýslu um sameiningu og Borgarfjarðarhreppur er í viðræðum við sveitarfélög á Austurlandi um sameiningu.

Þau 26 sveitarfélög sem voru með 251-999 íbúa þann 1. janúar sl. voru; Hvalfjarðarsveit, Grundarfjarðarbær, Dalabyggð, Reykhólahreppur, Tálknafjarðarhreppur, Vesturbyggð, Bolungarvík, Strandabyggð, Húnavatnshreppur, Blönduósbær, Sveitarfélagið Skagaströnd, Hörgársveit, Svalbarðsstrandarhreppur, Grýtubakkahreppur, Þingeyjarsveit, Skútustaðahreppur, Langanesbyggð, Vopnafjarðarhreppur, Seyðisfjörður, Djúpavogshreppur, Skaftárhreppur, Mýrdalshreppur, Hrunamannahreppur, Skeiða- og Gnúpverjahreppur, Grímsnes- og Grafningshreppur og Flóahreppur.

Sameining þessara sveitarfélaga við önnur sveitarfélög liggur kannski ekki eins beint við. Hvalfjarðarsveit og Akranesbær gætu sameinast, Tálknafjarðarhreppur og Vesturbyggð, Bolungarvík gæti sameinast Ísafjarðarbæ, Þingeyjarsveit og Skútustaðahreppur eru í viðræðum, Seyðisfjörður og Djúpavogshreppur eru í viðræðum við Fljótsdalshérað og Borgarfjarðarhrepp, Skaftáhreppur og Mýrdalshreppur gætu sameinast svo dæmi séu nefnd.

En svo verður tíminn að leiða í ljós hvaða sveitarfélag sameinast hverju.

Færðu inn athugasemd