Sarpur fyrir júlí, 2017

Inga Sæland leiðir Flokk fólksins í höfuðborginni

FlokkurfolksInga Sæland formaður Flokks fólksins mun leiða lista flokksins í Reykjavík í sveitarstjórnarkosningunum í maí 2018. Þetta kom fram í viðtali við hana á mbl.is í tilefni af því að flokkurinn mældis með 6,1% í skoðanakönnun MMR. Aðspurð segir hún að stefnt sé að því að bjóða fram í sem flestum sveitarfélögum.

Auglýsingar

Færðu inn athugasemd

Fækkun sveitarfélaga fyrir vorið?

Á nokkrum stöðum á landinu er verið að skoða sameiningar sveitarfélaga en kosið verður til sveitarstjórna í maí 2018. Lengst eru mál líklega komin hjá Sveitarfélaginu Garði og Sandgerðisbæ en þar hefur verið skipað í samstarfsnefnd um sameiningu sveitarfélaganna tveggja.

Á Snæfellsnesi eru hefur verið umræða um sameiningu Grundarfjarðarbæjar, Helgafellssveitar og Stykkishólmsbæjar. Eyja- og Miklaholtshreppur ákvað á fundi í júní sl. að skoða fjóra kosti þ.e. að vera áfram sjálfstætt sveitarfélag, skoða að vera með í ofangreindri sameiningarumræðu eða skoða hlutina með Snæfellsbæ eða Borgarbyggð.

Á Norðurlandi vestra hafa sveitarfélögin Skagabyggð og Sveitarfélagið Skagafjörður ræðst við. Akrahreppur hefur lýst yfir vilja til að koma að viðræðunum en öllum sveitarfélögum á Norðurlandi vestra hefur verið boðið að viðræðuborðinu. Sveitarfélögin í Austur Húnavatnssýslu hafa ákveðið að boða til sameiginlegs fundar seinni partinn í ágúst til að fara yfir málin. Ekki er vitað með vilja Húnaþings vestra.

Á síðasta ári voru settar fram hugmyndir hjá Akureyrarkaupstað um sameiningu allra sveitarfélaga við Eyjafjörð. Dræmt var tekið í þær hugmyndir að hálfu flestra sveitarfélaga á svæðinu.

Sameiningarviðræður hafa átt sér stað á milli Djúpavogshrepps, Sveitarfélagsins Hornafjarðar og Skaftárhrepps. Stefnt er að íbúafundum í haust.

Í Árnessýslu stendur yfir greining á kostum og göllum þess að sameina öll sveitarfélög í Árnessýslu. Íbúafundir voru haldnir í júní. Sveitarfélögin eru Bláskógabyggð, Flóahreppur, Grímsnes- og Grafningshreppur, Hrunamannahreppur, Hveragerðisbær, Skeiða- og Gnúpverjahreppur, Sveitarfélagið Árborg og Sveitarfélagið Ölfus.

Gangi allar þessar hugmyndir eftir gæti sveitarfélögum fækkað um allt að tuttugu en þau eru 74 í dag. Reynslan kennir reyndar að það er ólíklegt.

Athygli vekur að nokkur af minnstu sveitarfélögunum sem telja um eða innan við 100 íbúa eru ekki í viðræðum um sameiningu sveitarfélaga. Þau eru Árneshreppur (46 íbúar), Skorradalshreppur (58), Tjörneshreppur (59), Fljótsdalshreppur (81), Svalbarðshreppur (95),  Kaldrananeshreppur (106) og Borgarfjarðarhreppur (116).

 

 

 

Færðu inn athugasemd